طريقة صنع الشباكية في الدار

السلام عليكم

اليوم جبت ليك مقادير الشباكية اللي اعتمدت انا وناسي وصاوبناها نهار الاحد وجات هشيشة وفنة

المقادير

- زلافة الجنجلان مطحون مزيان -رابعة الزبدة مدوبة - 2 كيسان الزيت-نص زلافة لوز مطحون مزيان- 3 بيضات-نص كاس خل-نص كاس زهر-جوزة محكوكة-الخرقوم -معلقة القرفة-نص كاس النافع مطحون-نص كاس حبة حلاوة مطحونة 4 كيسان ماء دافئ-معلقة صغيرة الخميرة - 2.5 فورص زيت القلي . العسل

الطريقة


نخلط المقادير مزيان  ونزيد طحين بشوية بشوية حتا تجمع راسها مزيان وتكون قاصحة وندلكها شوية ونبدا نصاوب حرابل صغار
نكرصهم شوية بالمدلك وندوزهم في الماكينة ديال تسارح العجين باش يكون شكل واحد في السمك احسن من المدلك
واللي سرحتها نقطعها بالجرارة نخلي 1سم وندير خط ونخلي 1سم وخط حتا نصاوب اربعة خطوط ونشبكها كيف موالفين تشباك ونحط في الاطات حتا نسالي ونبدا نقلي ونحط في العسل حتا يشربه شوية ونديرهم في كسكاك يتسقطره ونستف بوحدة بوحدة في السطلة بعدما نرشها بالزنجلان

بالنسبة العسل كيخص توجدي 6 كيلوا سنيدة مع 12 كاس عنبة ماء سخون و3 ليبتون  وحامضة مقطعة وكموسة فيها شوية الزعتر زعيتر وعود قرفة ونسد الكوكوط واحد 45 دقيقة ونطفي عليه حتا يبرد عاد نستعمله انا وجدته ليلة قبل

نخليكم مع الصور

العسل





العجين فاش تحربلات وتقطاع بالجرارة






ها هيا كتقلى في الزيت ومن بعد في العسل






ها هيا شحال خرجات ليا المقادير

tbarkellah 3la lala khadija allah y3tik sa7a bayna ldida whta chkel ghzal

الله يبارك فيك ابتسام ويخلي ليك وليداتك